Vertelfestival Expeditie Ameland

Expeditie Ameland

Op it ynternasjonale fertelfestival ‘Expeditie Ameland – A storytelling adventure’, oer mear dagen útsmard, giest as besiker op ûntdekkingsreis. Mei it deiboek út 1818 fan walfiskfarder Hidde Dirks Kat as ynspiraasjeboarne, ûntdekst oan ‘e hân fan ferhalen ferskate kultueren en talen.

De Amelanner walfiskfarder en robbejager Hidde Dirks Kat sloech brek op Grienlân, dêr’t hy rêden waard troch de ‘wylden’. Syn deiboek út 1818, yn 2018 krekt 200 jier âld, lêst as ien grut aventoer. Hy fernuveret him dêryn oer de gastfrijens en behelpsumens fan de Inuït. Mei it deiboek as ynspiraasjeboarne hat ‘Expeditie Ameland – A storytelling adventure’ twa tema’s: ‘aventoer’ en ‘ moeting mei de/it frjemde’.

Do wurdst as besiker útdage om yn ‘e kunde te kommen mei minsken en dingen dy’t dy net eigen binne. Yn in tiid dat minsken en folken frjemd faninoar lykje te wurden, kinst op it festival goed fiele dat begryp fan wjerskanten dwers troch barriêres fan taal en kultuer hinne mooglik is! Amelanners en Inuït komme direkt en yndirekt oan it wurd.

Profesjonele fertellers út binnen- en bûtenlân drage dêr mei harren ferhalen oan by.

Ûnderdielen fan it festival sille wêze: fertelwurkwinkels, ferhale(far)tochten en in meartalige jûnsfoarstelling. Der komt ek in edukatyf programma foar skoallen. Expeditie Ameland is ûnderdiel fan it iepen Amelanner keunstprojekt Buro HDK2018.

[link: http://hdk2018.nl ]

Wêr

It Amelân

Wannear

Maaie 2018

Partners

Frank Belt van Op Verhaal