Frjentsjer wie eartiids in ferneamde universiteitsstêd dêr’t heechleararen en studinten út hiel Europa gearkamen. Yn de universiteitseal is de sfear fan dy tiid werom brocht. Besjoch hjir de portretten fan heechleararen, ien fan de trije lêste xyloteken fan Nederlân en it planetarium yn it lyts, de Orrery.
Anna Maria van Schurman wie de earste frou yn de santjinde iuw dy’t oan de universiteit studearre. Oan har talinten is in prachtige seal wijd. Hjir fynst ûnder oaren har skilderijen, har minuskule selsportretten en de protte brieven dy’t se skreau oan René Descartes, Jacob Cats, Christina fan Sweden en tal fan oare wittenskippers, filosofen en leauwigen.
Op de bel-etage sjochst hoe’t de Martenastins fan de sechstjinde iuw ôf bewenne waard. Do kuierest troch de gongen, priuvest lekkernijen yn de pronkkeuken, drinkst in kop tee yn de túnkeamer en makkest kunde mei de ferskate Frjentsjerter gesichten fan it Martenahûs.
Op souder binne de Bûtenbeentsjes te finen, it Oardiel fan Salomo en de Kermis fan Kooistra. Bern kinne har útlitte by de kermis. Goai in munt yn de automaat en de ljochten geane oan, de attraksjes draaie en de kermismuzyk klinkt troch de romte. Yn de útstalling Bûtenbeentsjes steane njoggen bysûndere minsken sintraal en wurde harren ferhalen ferteld. Ek is der omtinken foar de skiednis fan de psychiatry yn Frjentsjer.
