Sleat – 600 jier stedsrjochten. Fan hannelsplak ta festingstêd.**

Stedsrjochten

Stedsrjochten wiene yn de midsiuwen fan grut belang. Se joegen in plak beskate frijheden, lykas it rjocht om merken te hâlden, eigen bestjoer te fieren en ferdigeningswurken oan te lizzen. Tagelyk brochten dizze rjochten ek ferantwurdlikheden mei. Yn de tentoanstelling wurdt útlein wêrom’t stêden stedsrjochten krigen, wat dat konkreet betsjutte foar Sleat en hoe’t dizze rjochten bydroegen oan de ûntwikkeling fan de stêd.

Oan ’e hân fan in oantreklike tentoanstelling en in tal histoaryske objekten wurdt it ferline fan Sleat tagonklik makke foar in breed publyk. Besikers krije ynsjoch yn de posysje fan Sleat binnen Fryslân en de rol dy’t de stêd spile yn de ferdigening fan de wetterwegen en it omlizzende gebiet.

Tolve swurden

Neist de tydlike tentoanstelling wurket Museum Sleat oan in nije fêste presintaasje rûnom de tolve swurden fan Sleat. Dizze bysûndere kolleksje twahâns-swurden is unyk yn Nederlân en luts koartlyn in soad lanlike oandacht. Deskundigen fan it Nationaal Militair Museum ûndersochten de swurden yngeand, wat late ta publisiteit yn ûnder mear it NOS Journaal, it Jeugdjournaal en ferskate lanlike media.

De swurden fertelle in spannend ferhaal oer de Tachtichjierrige Oarloch en de strategyske betsjutting fan Sleat yn dy perioade. Mei in nije presintaasje dy’t yn septimber iepen sil foar publyk, wol it museum dizze bysûndere objekten in prominint en duorsum plak jaan, sadat besikers it ferhaal efter de swurden better begripe kinne.

Profesjonele ûntwerpers

Foar de ynrjochting fan sawol de tentoanstelling as de nije presintaasje De swurden fan Sleat wurket it museum gear mei profesjonele ûntwerpers op it mêd fan romtlike en grafyske foarmjouwing. Dêrmei wol it museum in oantreklike en tagonklike presintaasje biede foar sawol ynwenners as besikers fan bûten de regio.

Mei dizze projekten set Museum Sleat in folgjende stap yn de fierdere ûntwikkeling fan it museum. Nei de fernijing yn 2023 wol it museum de skiednis fan Sleat op in eigentiidske wize fertelle bliuwe troch tydlike tentoanstellingen en ynspirearjende aktiviteiten.